中國擴大內需有難度

曹sir 2008/11/11

中國擴大內需有難度

中國內需市場好細，消費只佔GDP 36％（美國超過70％），投資反佔42％；投資主要係服務出口需求。點樣擴大只佔GDP 36％消費性內需去抵銷出口方面嘅增長率萎縮？去年大量資金湧入中國，炒人民幣升值，刺激A股及樓價暴升，今年無論A股及樓價皆暴跌。去年雙盈餘（貿易及資金淨流入盈餘），造成流動性泛濫，央行曾大量發債及提升存款保證金率兼加息，仍無法全部吸收過剩資金，而引發資產價格膨脹。今年外貿盈餘減少，流入資金亦大減；加上美元至今年6月前貶值，令中國外滙儲備相對冇咁值錢。全球流動性進入退潮期，未因各國刺激方案推出而改變方向。

中國經濟學家常修澤表示，擴大內需有兩個方向：一個係消費性內需；一個係投資內需。
前者較後者難度要大，因為城鄉老百姓收入唔大幅提高，點樣增加消費？去年佔六億人口嘅農民年收入只有4000多元人民幣，點樣增加內需？至於投資內需主要嚟自政府及企業，4萬億元人民幣刺激經濟方案主要係基建設施、環保及創新型投資，對消費性內需唔一定有利。