霸王（1338）硬上市

龔耀輝 2009/0626

你睇招股書，會睇啲乜？睇風險因素（證明你是行家，想睇睇對手有什麼死穴）？睇三年數據（證明你是財經紀者，想睇過去派息多少，大股東袋幾錢落袋，寫一篇財經八卦新聞）？睇股本結構（證明你是憎人富貴厭人貧，想知道大股東是否賣舊股套現，實行賺一筆）？
如果要睇，最高境界應該是睇老細是怎樣的一個人。
忘記了在那份報紙讀過，霸王（1338）老細【圖】說公司並沒有資金壓力，上市純粹為了打響品牌及迎合資本市場運作（大意）。只要大家有睇招股書（相信大家一定冇），都會覺得他未算講大話。不過，錢沒有人嫌多，公司錢多，有上市知名度，雖然做事會多規限，但總會利多於弊。
老細諗過集資金錢點用
最睇得出老細是怎樣一個人，當然要睇蛛絲馬迹，例如資金用途。霸王的資金用途，妙在並非在用途身上，是銀碼。「700萬元用作升級現有資訊科技系統」、「126.4百萬元用作資本開支」，而最有意思的是「140.4百萬元用作擴展及加強中國分銷網絡」。望見這堆數字，你有什麼啟發？老細原來是認真計過諗過，上市後這筆錢點用。本來可以寫「不多於1000萬」、「130百萬」、「140百萬」齊頭數，有幾十萬元出入，全世界不會care，無人會上門找晦氣。但老細寫出來，就實牙實齒，連幾十萬元的零頭都跟你計。看見這裏，你不禁「動L」，眼前一亮。
公司零負債
睇睇派息，如果把上市等於賣殼看待（雖然這樣比喻極為不妥），大股東在上市前，派走所有現金，甚至派到要借錢，你都奈佢唔何。把上市前辛苦所賺計數，上市後大家一條船再打江山，無可厚非。
霸王老細點派息都仍然留3億元現金在公司，零負債，資產負債表簡單乾淨到不得了。換着是我，打死唔上市，自己賺自己使。還有，內地人收股息，要交稅。要攞走公司錢，方法大把，派息最蠢。橫睇掂睇，老細沒有一心搶錢。
民企最難睇是睇人，睇老細這個人，毋須上市卻硬要上市，若非為搶錢，又把用錢看得仔細，這個人「動L」，秀髮亮麗。截票後才寫這篇文，以免有人以為我收咗錢。